近年经常都话「生仔要考牌」，《寻人记 II》第8集主角梁惠英 早喺80年代已经系「妈妈界」学艺KOL，英姐1989年曾接受《星期一档案》访问，佢为咗做「好妈妈」，主动去「防止虐待儿童会」学习唔靠藤条教小朋友。

 

事隔多年，摄制队凭一名学员女儿就读嘅幼稚园锁定屯门安定邨，再透过邨内「防止虐待儿童会」办公室职员帮忙，成功寻获英姐。相隔33年再次受访，最大分别系当年未有亮相嘅英姐老公华哥终于出镜自我介绍，澄清一家并非「单亲家庭」。

 

华哥笑言自己系屋企嘅「茄喱啡」，太太先系主角。全程笑嘻嘻嘅华哥，喺大仔阿Ken 提及弹琴往事时，仲忽然金句王上身大赞：「方东升唔怕弹架！」阿Ken即醒目接招：「因为佢冇得弹。」搞到平时金句唔停口嘅方东升 「红都面晒」。

 

英姐当年喺镜头前略带表情略显担忧，对两子关怀备至；今时今日更加多咗一份威严同唠叨，难得儿子Ken同Eric不时开妈妈玩笑，母子间吃饭话题更由留班「升级」到烂 Gag IQ 题，一家人乐也融融。

 

谈及当年嘅「好妈妈」课程，Eric透露英姐曾因出入「防止虐待儿童会」一度被误会虐儿，不过英姐豪不介意；而今日已为人父嘅Ken就大赞课程有效，仲同英姐等整理咗课程五大要素：

 

 

摄制队又安排英姐同当年课程导师黄姑娘重逢，三十多年后再见，两人兴奋尖叫，又「加料」安排佢哋同另一同学电话「相认」。黄姑娘又寄语英姐同其他家长学会「断舍离」，唔好「养儿一百岁，长忧九十九」，黄姑娘话：「父母嘅角色到咗咁上下要淡番出嚟，仔大女大要学吓识锡自己，我觉得做父母嘅付出好大，其实小朋友大个就唔使你照顾架喇。」

 

方东升喺结尾亦话：「妈妈嘅最高境界，唔系陪子女成长，而系同子女一起成长」，至今仍学习如何做一好妈妈嘅英姐，对大仔Ken即将移民，就示范为人父母应如何放下：「我系唔舍得阿Ken飞架，但佢有佢嘅前途，佢有佢嘅打算，不如学吓放下」、「佢有头家，我哋做父母嘅，梗系希望佢好好哋照顾屋企，咁你屋企好，我哋唔使挂心你，咁大家都安心咯。」

 

来源：TVB 娱乐新闻台 TVB Entertainment News